Qeveria e Kosovës miratoi sot taksimin 100% për produktet e importuara me origjinë nga Serbia dhe Bosnja e Hercegovina. Vendimi erdhi menjëherë pas votimit kundër anëtarësimit të Kosovës në INTERPOL.
Menjeherë pas marrjes së këtij vendimi drastik, vijnë edhe reagimet e para. Drejtori i Institutit për Çështjet Evropiane, Naim Leo Beshiri tha për Tirana Today se autoritetet e Kosovës po sfidojnë Marrëveshjen e Tregtisë së Lirë të Evropës Qendrore (CEFTA).
I pyetur nga Tirana Today lidhur me masën e qeverisë kosovare pas votës së Serbisë kundër anëtarësimit të Kosovës në Interpol, Beshiri u shpreh se ky vendim rrezikon tashmë edhe zgjidhjet e dakordësuara mes dy shteteve në fusha të ndryshme, ndërsa shtoi se rritja e taksës shkon edhe kundër qytetarëve të Kosovës duke bërë që prodhimet serbe të bëhen më të shtrenjta për ta.
“Autoritetet e Kosovës po sfidojnë marrëveshjen e CEFTA-s, duke rrezikuar dialogun Beograd-Prishtinë dhe liberalizimin e vizave duke imponuar taksa shtesë për mallrat serbe. Kjo nuk është në përputhje me marrëdhëniet e fqinjësisë së mirë dhe do të rrezikojë tashmë zgjidhjet e dakordësuara mes dy shteteve në fusha të ndryshme. Është mjaft e qartë se ky veprim vjen pas votimit për anëtarësimin e Kosovës në Interpol dhe mungesës së aftësisë të Ministrisë së Punëve të Jashtme të Kosovës për të bindur shtetet që mbështesnin pavarësinë e saj dhjetë vite më parë. Pavarësisht nga sfida, mënyra e vetme për zgjidhje të përbashkët është një marrëveshje e ndërsjelltë që respektohet nga të dyja palët. Së fundmi, rritja e taksave shkon edhe kundër qytetarëve të Kosovës, duke bërë që mallrat serbe të shtrenjtohen për ta. Edhe pse Serbia gjithashtu përfiton nga shitja e mallrave në Kosovë, Kosova është ajo që mbështetet në importet nga Serbia”, tha kreu i Institutit për Çështje Evropiane ekskluzivisht për Tirana Today.
Vendimi për taksimin 100% për produktet serbe u miratua sot nga qeveria e Kosovës, pas propozimit të ministrit të Tregtisë, Endrit Shala. Kjo masë ishte paralajmëruar më herët edhe nga kryeministri Ramush Haradinaj, në rast se Serbia bllokonte anëtarësimin e Kosovës në Interpol.
Nga ana tjetër, presidenti Aleksandër Vuçiç ka vendosur të zhvillojë një takim ta paplanifikuar me ambasadorët e Kinës, Rusisë, BE-së, Amerikës, Mbretërisë së Madhe, Gjermanisë, Italisë dhe Francës.
Po ashtu, kabineti i Vuçiç do të mbajë pasditen e sotme një takim me Këshillin për Sigurinë Kombëtare./ TIRANA TODAY
