Një reformë e re në Policinë e Shtetit, synon t’i japë fund vendosjes së gjobave në letër. Tashmë pritet një kalim në epokën digjitale.
Kështu tha Rama në aktivitetin e Policisë së Shtetit ditën e sotme ku u prezantuan 134 mjete të reja policore.
Kryeministri ka kërkuar që të avancohet me reformën në shërbimin e gjobave.
Sipas tij, është e papranueshme që gjobat ndaj qytetarëve të vendosen ende në blloqe letrash. Rama tha se ata duhet të vendosen në një sistem të ri teknologjie.
Kjo, do të shmangë korrupsionin sikurse ndodh në komisionet e marrjes së patentave.
Heqja nga përdorimi e gjobave në letër, do të bëhet përmes monitorimit të rrugëve nga kamerat. Syrvejimi me kamera do të mund të përcaktojnë dhe regjistrojnë shkeljet rrugore që bëhen nga automjetet.
“Përveç makinave të reja, të kemi monitorimin e rrugëve, kamerat në të gjithë akset kryesore. Do të kemi rezultat me një reformë që më ra goja, reformën e shërbimit lidhur me gjobat. Nuk mund të vazhdojë më Policia e Shtetit me letra bakalli, duke marrë shënim me biografinë kur vë gjobë. Duhet të kalojmë me sistemin e teknologjisë. Jo policë që rrinë të fshehur rrugëve. Është koha për të kapërcyer në një epokë tjetër. Tani kjo punë duhet finalizuar. Duhet të marrë fund koha e patentave që ju merret qytetarëve. Teknologjia na e mundëson plotësisht këtë gjë”, tha Kryeministri.
Rama foli edhe për tenderat e uniformave të punonjësve të Policisë së Shtetit. Për të cilat tha se do të aplikohet një tjetër model, sikurse ndodh në vendet e Bashkimit Evropian. Çdo punonjës policie do të ketë kartën e fondit personal dhe ky shërbim do të jetë i personalizuar./TIRANA TODAY/
