Prej ditësh përflitet një kalim i Neymar te PSG, por sipas medieve italiane kjo lëvizje shumëmilionëshe do të shkaktojë një efekt domino në merkaton e sulmuesve evropianë. Me transferimin e brazilianit në kryeqytetin francez i pari që do të sakrifikohej do të ishte Edinson Kavani.
Objektivi i ri i Milanit në merkato do të ishte uruguaiani dhe nga ana tjetër 30-vjeçari nuk do të ishte kundër një rikthimi në Itali ku më parë ka luajtur me Napolin ku edhe u bë i njohur. Për të kuqezinjtë do të ishin gati të shpenzonin milionat e fundit.
Kavani do tu përshtatej me përsosmëri skemave kuqezi pasi garanton volum loje me dhe pa top, luan për skuadrën dhe nuk kursehet kurrë për t’u kthyer se herë ekipi ka nevojë. Ai e njeh mirë portën, por godet edhe nga larg, pa harruar nuhatjen për lojën në ajër, me pak fjalë përbën një profil ideal për atë që Milani prej javësh po kërkon në merkato.
Kujtojmë se Kavani ka një kontratë deri në 2020 me skuadrën e kryeqytetit francez dhe përfiton 10 milionë euro në sezon. Kartoni i tij vlerësohet mes 50 dhe 60 milionë euro. Një investim i tillë do t’i siguronte Montelës sulmuesin e duhur për të synuar jo vetëm titullin në Serinë A, por edhe kualifikimin në Ligën e Kampioneve për sezonin e ardhshëm apo një ecuri më të sigurt në Ligën e Europës nëse kuqezinjtë arrijnë të kualifikohen në fazën e grupeve.
Gjatë karrierës së tij 4 vjeçare në Francë, Kavani ka shënuar 88 gola në 133 takime ku vlen për t’u theksuar se jo gjithmonë është aktivizuar si titullar. Pas largimit të Ibrahimoviç, ai u shndërrua në liderin e sulmit parisien dhe vetëm në sezonin e kaluar ai gjeti rrugën e golit në 35 raste duke mos munguar në asnjë nga ndeshjet e PSG-së në kampionat.
Në Champions League, mesatarja e tij nuk ka zbritur nën 1 gol për ndeshje, prandaj ai mund të cilësohet si sulmuesi me vazhdueshmëri më të mirë në futbollin e kontinentit të vjetër.
