Nismës “#Edheunë” vazhdojnë t’i bashkohen me kalimin e orëve edhe më shumë figura të njohura publike.
Sot kësaj nisme i janë bashkuar edhe analisti Fatos Lubonja, shkrimtarja Flutura Açka dhe së fundmi pedagogu Agron Gjekmarkaj.
“Jo votime! Jo Diktaturë! Votimet plumb për demokracinë! Më 30 qershor me duar të pastra pa gishta të nxirë! Këtu jam-Më dënoni! Hape burgun Rama”, u shpreh pedagogu.
Kjo nismë nisi pas deklaratës publike që karikaturisti i njohur Bujar Kapexhiu bëri. Ai deklaroi se në 30 qershor nuk do të votonte, por do të përpiqej t’i pengonte ato duke pranuar të shkojë edhe në burg.
“Më 30 qershor unë pengoj votimet. Ju lutem më dënoni”, tha Bujar Kapexhiu pak ditë më parë.
Menjëherë pas deklaratës së tij, shumë persona të tjerë iu bashkuan nismës së tij, duke shpërndarë postimin e tij me hashtagun “#Edheunë”. Ndër ta edhe artistë e politikanë të ndryshëm, si aktori Neritan Liçaj, regjisori Robert Budina, ish-ministri i Jashtëm Besnik Mustafaj etj.
Kjo nismë vjen si pasojë e situatës së trazuar politike, pasi Kolegji Zgjedhor rrëzoi dekretin e presidentit Meta për anulimin zgjedhjeve.
