Duket se qëndrimi i Ramës për studentët ngelës, ka prekur një pjesë të shoqërisë. Reagimi i radhës ka ardhur nga regjisori i njohur Kastriot Çipi, i cili ndan me miqtë e tij historinë e jetës, një histori që jo çdokush do ta bënte publike.
Teksa e ka quajtur veten ‘ngelës’, me termin që Rama cilësoi më herët studentët protestues, regjisori shprehet se edhe ai është një i tillë. Çipi rrëfen se si ka ngelur në shkollë, vështirësitë për të marrë diplomën, të gjitha këto sipas tij në të njëjtën shkollë, në Akademinë e Arteve, aty ku ka studiuar edhe kryeministri Rama.
Duket se historia e trishtë nuk është lënë me kaq, pasi ai thotë se është ngelës edhe sot. Me gjithë diplomën për regji dhe përvojën si regjisor, ai nuk gjen dot punë as si mësues i teatrit në ndonjë nga 50 shkollat 9-vjeçare të Tiranës, sepse lëndën e teatrit e japin mësuesit e vizatimit ose të fiskulturës, që kanë teserën e “rilindjes”.
Regjisori thumbon rëndë Ramën, duke e cilësuar si gjeni. Sipas tij, kryeministri Rama nuk ka nevojë as për këshilltarë, madje as për ministra.
