Qeveria e Austrisë ka mbështetur propozimin e Francës për zgjerimin e Bashkimit Evropian, por me kusht që të kjo të mos ndikojë dhe vonojë hapjen e negociatave me Shqipërinë dhe Maqedoninë e Veriut.
Ministri i Jashtëm austriak, Alexander Schallenberg deklaroi: “Ne jemi të gatshëm për një reformë të procedurës së zgjerimit të BE, ka gjithmonë vend për përmirësim, por kjo nuk duhet të çojë në një taktikë vonuese për Shqipërinë dhe Maqedoninë e Veriut”.
Sipas Francës, “transformimet e thella politike, ekonomike dhe sociale, të nevojshme për një anëtarësim të ardhshëm në Bashkimin Evropian vazhdojnë të jenë shumë të ngadalta dhe përfitimet konkrete për qytetarët në shtetet kandidate mbeten të pamjaftueshme.”
Qasja e re që propozon Franca në dokumentin e paraqitur për diskutim bazohet në katër parime: “në asociimin gradual; në kushte të rrepta; në përfitime të prekshme; në mundësinë e kthimit pas.”
