Hetuesit grekë kanë krijuar një profil të njërit prej grabitësve që vranë 20-vjeçaren në krah të foshnjes 10-muajshe. Këtu i referohen udhëheqësit të supozuar të bandës.
Ky person përshkruhet si një burrë rreth moshës 40-vjeç. Ai fliste greqisht, por është dëgjuar teksa përmendte edhe fjalë shqip. Për këtë arsye, besohet të jetë shqiptar. Është biond, me flokë të shkurtra, i ashpër dhe i gjatë rreth 1.7 metra. Sipas hetuesve, vrasësi i urren gratë, e madje i keqtrajton brutalisht. E për këtë arsye, ai nuk e ka patur aspak të vështirë që të kryejë një vrasje të tillë.
“Ai i urren gratë, i keqtrajton brutalisht dhe nuk heziton të bëjë krim”, thuhet në një raport policor që e ka siguruar televizioni “Star” në Athinë. Sipas këtyre të dhënave, duket se hetuesit grekë e kanë krijuar identitetin e shqiptarit.
Hetuesit kanë arritur në këtë përfundim, duke iu referuar dëshmive të dhëna nga burri 32-vjeçar i viktimës, i cili ishte lidhur nga grabitësit.
Përpjekjet intensive dhe të pandalshme të autoriteteve greke dhe bashkëshortit të Carolines, Charalambos, zbuluan se gjuha në të cilën flisnin vrasësit brutal të 20-vjeçares Caroline ishte shqipja.
Charalambos me herët, në një dëshmi që ka dhënë në polici, ka theksuar se 3 kriminelët përveçse komunikonin në gjuhën greke, mes tyre flisnin edhe një gjuhë të huaj, që pas përpjekjeve për ta zbuluar rezultoi se ishte shqipja. Në dhomën në të cilët ndodhi ngjarja horror, janë gjetur gjurmë këpucësh që tashmë po ekzaminohen në laboratorët kriminalistikë të policisë.
