Policia e Tiranës ka arrestuar një 56-vjeçar, nën hetim për trafikim lëndësh narkotike, i cili kishte thyer masën e sigurisë “arrest shtëpie”, dhënë nga Gjykata. Largimi i tij nga shtëpia në Kamzë, është konstatuar rreth orës 09:00 të mëngjesit nga mbikëqyrja elektronike.
Vendndodhja e tij është zbuluar falë byzylykut elektronik dhe më pas është bërë arrestimi. Besim Zenuni u arrestua bashkë me një vajzë 25- vjeçare në dhjetor të vitit të kaluar, duke tentuar të trafikonin drejt Turqisë një sasi prej 23 kg drogë.
Pavarësisht se ishte i detyruar me vendim Gjykate që të qëndronte në shtëpi, madje kishte edhe mbikëqyrje elektronike, 56-vjeçari ka rrezikuar, duke u larguar në një distancë të konsiderueshme nga banesa. Në këtë formë është marrë edhe sinjalizimi për thyerjen e masës së sigurisë.
Më 2 dhjetor të vitit të kaluar, Policia sekuestroi sasinë e drogës, të llojit kanabis sativa, në pikën Kufitare të Kapshticës. Në atë kohë, Policia tha se kishte arrestuar shtetasit, Besim Zenuni, 56 vjeç dhe Ermira Elezi, 25 vjeçe, të dy banues në Tiranë. Lënda narkotike u gjet në automjetin tip “Peugeot”, në dalje nga Shqipërisë në drejtim të Greqisë.
Policia sqaroi se mjeti ishte në pronësi të 56- vjeçarit, Zenuni. Nga shërbimet e Policisë Kufitare, automjeti me të cilin ata udhëtonin është përzgjedhur në vijën e dytë për kontroll më të detajuar.
Gjatë kryerjes të këtyre procedurave, në kabinën e mjetit, (sediljet e pasme dhe të përparme), brenda gomës rezervë, si edhe në pjesën e shasisë, u konstatuan të fshehura e u sekuestruan në cilësinë e provës materiale 34 pako të mbështjella me letër natriban, me peshë 23 kg lëndë e dyshuar si narkotike kanabis sativa.
Dy të arrestuarit Besim Zenuni dhe Ermira Elezi, kishin si destinacion shtetin turk, ndërsa do të kalonin mes për mes Greqisë për të arritur në Stamboll. Policia kreu arrestimin e tyre në flagrancë me akuzën e trafikimit të lëndëve narkotike. Ndërsa disa ditë pas arrestimit, Gjykata vendosi që ata të qëndronin në “arrest shtëpie”, me mbikëqyrje elektronike.