Kreu i Partisë Demorkatike, Lulzim Basha i është përgjigjur akuzave të sotme të kryeministrit me anë të një fotoje.
Në mëngjes, Rama njoftoi me anë të një postimi në Facebook se nuk do të ketë asnjë biznes që nuk do të paguajë TVSH teksa akuzoi opozitën se po mbron informalitetin.
Basha ka publikuar një foto, ku duket një dyqan i mbyllur, të cilit i kanë ngjitur njoftimin: “Kthehem kur të ikë Edi Rama nga pushteti”, ndërsa shkruan se kryeministri duhet t’u bëjë të ditur shqiptarëve se sa para u ka dhënë oligarkëve nga buxheti i shtetit në këto 4 vite.
“Në vend që të kërcënojë sipërmarrësit e vegjël që punojnë sa për të mbajtur gjallë familjet e tyre, Edi Rama duhet t’u bëjë të ditur shqiptarëve sa para u ka dhënë nga buxheti i shtetit oligarkëve këto katër vite: oligarkët e shëndetësisë e të ilaçeve, oligarkët e ndërtimit, oligarkët e koncesioneve, oligarkët e naftës dhe të telekomunikacionit.
Pastaj t’u tregojë shqiptarëve edhe sa taksa kanë paguar këta oligarkë në buxhetin e shtetit.
Por ai nuk i tregon dot këto fakte, sepse ato zbulojnë një të vërtetë kriminale: zhvatjen e pamëshirshme të njerëzve të thjeshtë për pasurimin e Edi Ramës dhe klientëve të tij”, shkruan Basha në Facebook.
