Një atentat ndodhi sot në Shkodër, ku një tregtar peshku u qëllua për vdekje, ndërsa vrasësit me maska janë larguar me motor nga vendi i ngjarjes. Viktima është Fatos Ferracaku, 31-vjeç, i cili ndërroi jetë në spital, ndërsa i plagosuri Fatmir Mehaj është jashtë rrezikut për jetën.
Gazetari investigativ Artan Hoxha, thotë se viktima ishte pa ndonjë problematikë, por “mëkati” i tij i vetëm ishte fakti që Arjan Ferracaku, mbetur i vrarë në atentatin e 1 shtatorit 2018, ishte kushëriri i tij.
Me anë të një statusi në rrjetet sociale, gazetari ka përcjellë disa të dhëna në lidhje me këtë rast. Të dhënat e para flasin se objektivi i atentatit ka qenë Fatos Ferracaku, një njeri pa asnjë problematikë në të shkuarën. Ajo që e ndëshkonte ishte fakti se i ndjeri është djali i xhaxhait të Kujtim Ferracakut, babait të biznesmenit Arjan Ferracaku i vrarë më 1 shtator 2018, në zonën e Livadheve. Nga informacioni paraprak që ka gazetari, duket se ekzekutorët janë vrasës me pagesë.
