Një grua nga Ukraina ka pësuar djegie të rënda në trup, teksa burri i saj i ka hedhur 4 litra ujë përvëlues, gjatë kohës që ajo po flinte.
Anastasia Shapovalova ka pësuar djegie në pjesën e kokës, në fytyrë, në gojë dhe në trup. Sipas mediave të huaja, ajo po trajtohet në spital për djegie në 20% të trupit të saj, teksa policia është vënë në ndjekje të burrit të saj 33-vjeçar.
Gruaja u shpreh se një ditë para kësaj, ajo dhe burri i saj kishin folur në një park dhe se ndoshta ajo mund të ketë thënë ndonjë gjë që atij nuk i ka pëlqyer.
“Ai ndoshta nuk ka pëlqyer diçka. Nuk e di akoma se çfarë”, tha ajo nga krevati i saj në spital, pasi nuk pranoi që kamerat ta filmonin fytyrën e saj.
“Ne shkuam bashkë në krevat, në mbrëmje”, shtoi ajo.
Sipas dëshmisë së saj, ngjarja ka ndodhur në orën 6 të mëngjesit, kur ajo u zgjua nga uji i nxehtë që burri i saj po i hidhte përsipër dhe në gojë. Ajo u përpoq të largohej, por 33-vjeçari vazhdonte të derdhte ujë mbi të.
Si përfundim, gruaja arriti të dilte nga dritarja dhe i iu lut një kalimtari të merrte ambulancën në telefon./Tirana Today
