Ministri i Drejtësisë, Ulsi Manja, është fokusuar sot tek zyrtarët e korruptuar të Agjencisë së Trajtimit të Pronave. Duke u ndalur në emra konkretë, ai u shpreh se drejtuesja e këtij institucioni, Jonida Baçi, u shkarkua para pak ditësh me propozim të atij vetë nga kryeministri Edi Rama.
Në të njëjtën kohë paralajmëroi se kjo nuk është zyrtarja e vetme, pasi ka edhe të tjerë të nivelit drejtues të implikuar në korrupsion.
Sipas Ministrit të Drejtesisë, drejtuesja e Agjencisë së Trajtimit të Pronave, ka qenë e perfshirë në dy skema korruptive me ish-pronarët.
“Kur flas për zyrtarë të lartë, e kam fjalën për drejtuesen e këtij institucioni, e cila është shkarkuar para pak ditësh, me propozimin tim nga kryeministri, por edhe për zyrtarë të tjerë në atë agjenci”, tha Ministri i Drejtësisë.
Më tej, Manja inkurajoi SPAK që të vazhdojë punën me procesin hetimor, pasi i ka të gjitha kapacitetet.
“Lidhur në bashkëpunim me SPAK, unë e vlerësoj punën e SPAK në drejtim të luftës kundër korrupsionit dhe krimit të organizuar. E kam përshëndetur punën e SPAK, dhe kam besimin e plotë se SPAK ka jo vetëm kapacitetet e duhura hetimore për ta çuar para këtë proces, por edhe shumë procese të tjera penale”, u shpreh Manja.
