Policia ka arrestuar autorin e katërt të dyshuar për grabitjen dhe dhunimin e një të moshuari në banesë në Peqin, më 8 maj. Në pranga ka rënë 19-vjeçari me inicialet S.I., banues në Peqin, i cili ishte i shpallur në kërkim.
I riu në bashkëpunim me tre shtetasit me inicialet B.H., 30 vjeç, M.Ll., 27 vjeç, të dy banues në Peqin dhe E.Sh., 27 vjeçe, banuese në Durrës, të cilët u arrestuan më 11 maj, dhunuan dhe grabitën në banesë 76-vjeçarin, Skënder Zeqiri.
Grabitësit e kanë spikatur kohë më parë të moshuarin, dhe kanë gjetur momentin kur ai ishte vetëm në shtëpi për ta sulmuar. Dyshohet se shuma e grabitur është 60 mijë euro.
Njoftimi
Kapet dhe ndalohet autori i katërt i dyshuar për “Vjedhje me pasoja të rënda, e kryer në bashkëpunim”.
Shërbimet e Komisariatit të Policisë Peqin, në vijim të punës për kapjen e personave të shpallur në kërkim, bazuar në informacionet e marra në rrugë operative kanë bërë të mundur lokalizimin, kapjen dhe ndalimin e shtetasit S.I., 19 vjeç, banues në Peqin, i cili ishte i shpallur në kërkim nga Komisariati i Policisë Peqin.
Kapja dhe ndalimi i tij u bë pasi Gjykata e Rrethit Gjyqësor Elbasan, ka vendosur masën e sigurisë “Arrest në burg”, pasi më datë 08.05.2019 , në Peqin, ky shtetas në bashkëpunim me shtetasit B.H., M.Ll., dhe E.Sh., të cilët janë arrestuar më parë, kanë hyrë në banesën e shtetasit S.Z., dhe kanë vjedhur një sasi parash.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme.
