Aktivistët e LGBTI zhvilluan sot protestën e tyre për të drejtat e këtij komuniteti. Aleanca LGBT dhe Pro LGBT, komuniteti i Lesbikeve, Gay, Biseksualëve dhe Transeksualëve pedaluan me biçikleta pas “çadrës së lirisë” duke shmangur protestuesit e PD-së ndoshta për te evituar ndonjë konflikt të mundshëm.
Politikani që ironizoi këtë protestë në maksimum ishte Nard Ndoka, me sa duket ai nuk ka të njëjtin mendim me kreun e opozitës Lulzim Basha. Ndoka njihet për qëndrimet e tij publike kundër komunitetit LGBT, por sot mbajti qëndrim të fortë;
“Kjo është tolerancë: Qeveria proteston me biçikleta e tollumbace, në orën 11:00, për të drejtën e ‘tajares’! Opozita proteston në orën 12:00, për të drejtën e votës!”, shkruan Ndoka në faqen e tij në Facebook.
Më herët, aktivistët LGBTI kanë marrë garancinë direkte nga kryetari i Partisë Demokratike, Lulzim Basha se nga ana e mbështetësve të opozitës nuk do të ketë asnjë incident apo kërcënim për mbarëvajtjen e sigurt të këtij aktiviteti.
Në këtë paradë morën pjesë aktivistë LGBTI nga i gjithë rajoni, mbështetës, aktivistë dhe pjesëtarë të komunitetit LGBTI nga Shqipëria, si dhe përfaqësues të trupit diplomatik në Shqipëri
