Vrasja e 5-vjeçarit Hamid Imeri, nga babai i tij ka tronditur banorët e komunës së Jesi, në qytetin e Ankonës. Mësohet se vetëm disa orë pas krimit të rëndë, babai i djalit të vogël përpara autoriteteve italiane ka pranuar krimin e rëndë duke u shprehur se ai ishte vrasësi.
Shqiptari me origjinë nga Maqedonia pranoi vrasjen e të birit, duke thënë vetëm pak fjalë: “Jam i sëmurë, jam në depresion, unë nuk kam marrë ilaçe për më shumë se një vit …”.
Babai i Besartit, Bajrami, 58-vjeç rrëfen për “Corriere Della Sera” se djali i tij “nuk ka qenë kurrë një person i dhunshëm, por nga herë pas here kishte luhatje të mëdha, sikur i erreshin sytë”.
Ndërsa nga ana tjetër mediat italiane bëjnë të ditur se një nga arsyet se pse 27-vjeçari mund të ketë kryer këtë krim të rëndë është dhe papunësia. Ai 6 muaj më parë kishte humbur punën e tij si saldator.
Ngjarja e rëndë ka ndodhur pasditen e të enjtes, ku Besart Imeri i thotë bashkëshortes së tij Sevime 24-vjeç, e cila është tani në muajin e shtatë të shtatzënisë dhe pret fëmijën e tretë, se do të nxirrte djalin për një shëtitje, edhe pse jashtë ishte shumë ftohtë dhe dëbora kishte zbardhur rrugët.
Hamid kishte dhe një vëlla më të vogël 3-vjeçar. Babë e bir hipin në makinë, por vetëm pak çaste më pas, Besarti thërret për ndihmë, pasi djali nuk ndihej mirë.
Autopsia në trupin e fëmijës ende nuk është kryer, por hetuesit kanë gjetur tashmë shenja të dukshme në qafë. Në fillim, megjithatë, para se të rrëfente, Besart e kishte lënë makinën dhe kishte thirrur me zë të lartë për të afërmit, të cilët të gjithë jetojnë në të njëjtën ndërtesë: “Hamidi është ndjerë keq, vrapoi”. Pra, babai i tij, vëllai i tij, motra e tij zbritën dhe e mori fëmijën dhe e çuan në shtëpi, duke shpresuar që ai kishte shpresa për jetë. Ambulanca erdhi në çast por për Hamidin ishte tepër vonë.
Por Sevime, nëna e Hamidit, kur e kuptoi situatën u ndje shumë keq dhe është dërguar menjëherë në spital. Babai vrasës do të përballet tashmë në gjykatë me akuzën e vrasjes me paramendim. TIRANA TODAY
