Boksieri britanik, Tyson Fury pas një shkëputje 3-vjeçare nga ringu për probleme me drogën dhe depresionin është rikthyer për të arritur sërish majën. Ndeshjen e parë ka zgjedhur ta zhvillojë përballë shqiptarit Sefer Seferit, ku pavarësisht diferencave të mëdha në peshë dhe gjatësi ai ka refuzuar që ta nënvlerësojë Seferin. Ndeshja do të zhvillohet so në mbrëmje në Angli, në Manchester Arena.
“Unë nuk shoh asgjë të keqe pse përzgjodha Seferin. Pse duhet të kritikohet kjo? Njerëzit nuk e njohin fare atë. Ai ka peshuar 95 kilogram në matjet zyrtare. Sikurse Mike Tyson, Evander Holyfield dhe Muhammed Ali. Nuk mund të keni vëmendjen vetëm te masa kur flisni për kategoritë e rënda”, theksoi Fury duke shtuar se do të jetë një shfaqje fantastike e boksit mes tij dhe shqiptarit.
I pyetur nga Blick nëse ai mendon për Joshuan si kundërshtar të radhës, pasi këtë po e kërkojnë adhuruesit e tij, Fury tha se vëmendja duhet të jetë te Seferi. “Nuk mendoj fare për Joshuan. Kundërshtari im i radhës është Sefer Seferi. Mbajeni mend këtë emër. Këtë njeri duhet ta mposht së pari”, u shpreh Fury.
Dueli zhvillohet në ora 23:00 në Manchester Arena dhe kjo përballje pritet të transmetohet në shumë televizione anë e mbanë botës që me vëmendje do të presin rikthimin në ring të 29 vjeçarit nga Britania e Madhe.
