Një anëtare e këshillit të qytezës Heanor në Derbyshire të Anglisë ka habitur së fundmi me deklaratën e saj.
Sheila Oakes ka komentuar gjendjen shëndetësore të kryeministrit britanik, Boris Johnson, duke thënë se ai e meritonte këtë.
“Më falni por ai e meriton plotësisht këtë dhe është njëri ndër kryeministrat më të këqij që kemi pasur ndonjëherë”, shkruante laburistja Oakes.
Ajo është “detyruar” më pas të kërkojë falje publike, pasi komentet e saj ndezën shumë polemika. Sheila Oakes është pjesë e Partisë Laburiste në opozitë dhe siç raporton Daily Mail, nuk ishte e vetmja që bënte komente të tmerrshme kundër kryeministrit të sëmurë.
Këto komente i kanë kushtuar asaj pozicionin në këshillin e bashkisë së qytetit.
Kreu rajonal laburist Chris Emmas-Williams, tha se Oakes mund të mbetet këshilltare e pavarur, ndërsa shtoi se një hetim do të vijojë mbi sjelljen e saj.
“Si kryetar i grupit laburist i kërkoj falje Boris Johnson e familjes së tij dhe i uroj shërim të shpejtë, pasi kemi nevojë për të gjithë për të luftuar sëmundjen”, tha ai.
