Xhubleta shqiptare e lashtë 4 mijë vjet është pranuar në listën Trashëgimisë Kulturore jo-materiale nën mbrojtjen e UNESCO-s. Lajmin në fjalë e ka përcjellë Ministrja e Kulturës, Elva Margariti, e cila e ka cilësuar si një lajm të jashtëzakonshëm për trashëgiminë tonë kulturore.
Margariti e cilëson një lajm të jashtëzakonshëm për trashëgiminë tonë kulturore dhe si dhuratë në 110-vjetorin e Pavarësisë.
“Nga kryeqendra e Marokut, Komunitetit Ndërqeveritar për Mbrojtjen dhe Ruajtjen e Trashëgimisë Kulturore Jomateriale të UNESCO-s, miratoi në formë unanime shpalljen e xhubletës shqiptare dhe bërjen e saj, si pjesë të listës së Trashëgimisë Kulturore Jomateriale nën mbrojtjen e UNESCO-s”, tha Margariti, e cila mori pjesë në mbledhjen e Komitetit Ndërqeveritar për Mbrojtjen dhe Ruajtjen e Trashëgimisë Kulturore Jomateriale të UNESCO-s, që u zhvillua në Marok.
Xhubleta, veshje tipike e zonave të veriut, cilësohet si një prej kostumeve më të rralla popullore, me disa lloje e karakteristika, prerje e qepje, sipas zonave dhe moshave të grave që e vishnin.
