Një përplasje mes dy grupe të rinjsh është regjistruar pasditen e sotme në Sukth, si pasojë e të cilës mbeti i plagosur 17-vjeçari, Elvin Zira.
Ngjarja u regjistrua rreth orës 15:30 në lagjen “Stalla” në Sukth. Bëhet me dije se i plagosuri ndodhet nën kujdesin e mjekëve, ndërsa është identifikuar edhe autori i ngjarjes.
Elvin Zira dhe autori me iniciale M.I., i cili është shpallur në kërkim, kishin pasur një debat tre ditë më parë. Mësohet se ata ishin takuar ditën e sotme për t’u sqaruar, por gjërat nuk kanë shkuar ashtu siç pritej.
Secili prej tyre shkoi në lagjen ku e lanë për t’u sqaruar me grupet e tyre. Por debatet verbale, sharjet dhe ofendimet ia lanë më pas vendin përdorimit të armëve të ftohta.
Bashkëmoshatari i tij e ka qëlluar me thikë 17-vjeçarin, ndërsa më pas një tjetër nga shokët e autorit tentoi që ta godiste me sëpatë, por për fat të mirë është shmangur.
Adoleshenti i plagosur është paraqitur vetë në ambientet e spitalit, teksa mësohet se ai ka marrë një goditje në ije.
