Familjet që kanë humbur shtëpitë dhe të afërmit nuk do të kthehen në Thumanë. Kështu ka deklaruar Kryeministri Rama. Sipas tij, vendi është traumatik dhe asnjë prej të dëmtuarve nuk ka arsye të kthehet aty. Kryeministri vuri në dukje se brenda 15 dhjetorit të gjitha familjet që humbën të afërmit dhe banesat e tyre u kthyen në gërmadha, do të akomodohen nëpër shtëpi.
“Hotelet do të fillojnë të zbrazen pas vitit të ri. Hapja e dyerve për të tjerë, duhet të jetë e kufizuar, pasi hyjmë në fazën ku mund të fillojnë spekulime. Familjeve që janë të hotel do u ofrojmë dy rrugë; atë të dhënies së lekëve në dorë dhe banesën ta gjejnë vet. Brenda atij fondi në zonën e Durrësit dhe Thumanës ka dhe koston e transportit. Dhe rruga tjetër është; ose do ja gjejmë vet. Mos harroni, 15 dhjetori është afati i fundit për të sistemuar në shtëpi familjet më fatkeqe. Për ta duhet të mbarojë procesi dhe duhet të jenë në shtëpi”, tha Rama.
Gjatë takimit të qeverisë, kryeministri përmendi dhe rastin e dy fëmijëve të vegjël Alesio dhe Aureli. Ata shpëtuan mrekullisht, pasi u hodhën nga dritaret e pallatit, duke i shpëtuar tragjedisë.
“Dhe ata fëmijët që isha unë mbrëmë, duhet të shkojnë në shtëpi. Duhet gjetur dhe mënyra se si do të kujdesemi për njërin prej tyre që e ka nënën në spital dhe ka humbur të tjerët. Duhet t’i japim shtëpinë dhe duhet t’i vëmë një kujdestar. S’mund t’i japim një fëmije çelësin e shtëpisë. Daja jeton në Angli dhe ka ardhur përkohësisht. Mund të hyjë përkohësisht, por shtëpia është aty për një kohë të gjatë dhe do të jetë në emër të tij (djalit). Ai është i zoti i shtëpisë. Duhet të marrim masa që të jetë e plotësuar me të gjitha. Sikundër unë e dija më parë, asnjë nga ata që kanë pasur shtëpitë në pallatet e shembura nuk do që të shkojë atje, e kanë tmerr. Vetëm ideja që të shkojnë atje është tmerr. Kështu që s’kemi ça të ndërtojmë atje, dhe ata që kanë humbur dhe ata që s’kanë humbur njerëz.”, theksoi Kryeminstri.
