U mbajt mbrëmjen e djeshme nata e parë gjysmëfinale e “Eurovision” ku performuan dy këngëtarët shqiptarë Eugent Bushpepa që përfaqëson Shqipërinë dhe Eleni Foureira që përfaqëson Qipron. Bushpepa e ngriti publikun në këmbë me performancën mbresëlënëse me këngën “Mall” dhe po ashtu, edhe Eleni Foureira e dogji skenën me këngën “Fuego”. Të gjithë shqiptarët u gëzuan shumë që Eugenti dhe Eleni kaluan në finale, por ata nuk janë vetëm.
Edhe Ermal Meta është gjithashtu zyrtarisht në finale pasi Italia bën pjesë këtë vit në Eurovision Big 5, shtetet të cilat kanë avantazhin që nuk konkurrojnë në gjysmëfinale pasi financojnë këtë event.
Reagimi i Bushpepës
Pas tre vitesh mungesë në finalen e Eurovision, Shqipëria me Eugent Bushpepën dhe këngën “Mall” këtë vit arriti të kualifikohej për në natën e madhe. Pas gjysmë finales së parë ku Eugenti këndoi i treti, u mbajt një konferencë me artistët që performuan. I pyetur nga prezantuesi nëse ndjen të njëjtat emocione kur këndon në këtë event me emocionet që ndjen kur këndon në club, Eugenti u përgjigj: “Për sa kohë që transmeton emocione me anë të muzikës, është e njëjta gjë”. “Skena ishte fantastike. U ndjeva shumë mirë, publiku ishte gjigant. Të ndash dashurinë me publikun është njësoj”, u shpreh Eugenti.
I pyetur nga një fans gjatë konferencës se kujt ja kushton këngën, ai u përgjigj: “Është një këngë për dashurinë, është një këngë për mallin ndaj personave që do më shumë, kështu që unë ja dedikoj të gjithë shqiptarëve sepse po më mungojnë shqiptarët që kur kam ardhur këtu”.
