Policia e Fierit ka zbardhur një plagosje ndodhur një ditë më parë. Në pranga është vënë një 52-vjeçar, e ndërsa i plagosuri aktualisht ndodhet nën kujdesin e bluzave të bardha. Pasi janë njoftuar për ngjarjen, blutë e Fierit kanë arrestuar në flagrancë shtetasin Xhevat Bregu, 52-vjeç, banues në Mbrostar, Fier. Autori dhe i plagosuri janë konfliktuar për motive të dobëta.
Njoftimi i policisë:
Plagos me mjet prerës një shtetas, policia identifikon dhe kap autorin. Specialistët për Hetimin e Krimeve të Rënda në Drejtorinë Vendore Fier, arrestuan në flagrancë shtetasin Xhevat Bregu, 52-vjeç, banues në Mbrostar, Fier.
Në datën 04.07.2018, rreth orës 18:20, në lagjen “8 Shkurti”, për motive të dobëta janë kofliktuar shtetasit Xhevat Bregu dhe P.Gj, 63-vjeç, banues në Daullas, Fier. Gjatë konfliktit, shtetasi Xhevat Bregu ka goditur me mjet prerës (thikë) shtetasin P.Gj, i cili ndodhet në Spitalin Rajonal Fier, nën kujdesin e mjekëve.
Autori pasi ka goditur shtetasin P.Gj, është larguar nga vendngjarja. Shërbimet e policisë pasi morën njoftimin, organizuan punën dhe gjatë mesnatës bënë të mundur kapjen dhe arrestimin në flagrancë të tij.
Materialet i kaluan Prokurorisë pranë Gjykatës së Shkallës së Parë Fier, për veprat penale “Vrasje e mbetur në tentativë” dhe “Prodhimi, mbajtja, blerja apo shitja e armëve të ftohta”.
