Një 67-vjeçar është gjetur i vrarë mëngjesin e sotëm në Fier. Petraq Gjika u gjet i pajetë rreth orës 06:40 dhe dyshohet se është vrarë me thikë. 67-vjeçari punonte si roje në serat e fshatit Mbrostar Ura në Fier.
I ndjeri mësohet se ishte vëllai i kryeplakut të fshatit Grecalli, Vasil Gjika. Paraprakisht dyshohet se ka qenë një person i vetëm ai që ka kryer vrasjen, autori është larguar në këmbë nga vendi i ngjarjes.
Objekti ku punonte, ruhet me kamera sigurie. Në vendngjarje ka shkuar menjëherë policia e Fierit, e cila po merr të gjitha provat nga vendi i ngjarjes qe mund te çojnë tek autori i saj. Sipas të dhënave nga fshati ku banonte roja e serave, Petraq Gjika, i ndjeri kishte kohë që punonte roje nate. Para disa kohësh ai kishte pasur një konflikt, ku edhe është rrahur.
HISTORIA E VITIT 2018:
Petraq Gjika qëllohet me thikë brenda një lokali. Ngjarja ndodhi më 4 korrik 2018. Në atë kohë, Gjika pësoi lëndime në dorë dhe bark. Shkak i plagosjes u bë vendi i punës i Gjikës. Në atë kohë, ai kishte filluar punë si roje nate në një lokal, ku më parë punonte në të njëjtin pozicion autori i dyshuar i plagosjes. Ky i fundit mori hak duke e plagosur.
