Komisioni Qendror i Zgjedhjeve ka vendosur për heqjen e mandateve të deputetëve Rakipi dhe Rehovica.
Këta të fundit preken nga ligji i dekriminalizimit, ndërsa vendimi u mor me 5 vota pro.
Sipas vendimit të prokurorisë, të dy deputetëve u janë marrë shenjat e gishtave në shkurt dhe i janë dhënë Interpolit. Në datën 22 dhjetor Interpol Roma solli të dhëna për dy deputetët.
Për deputetin e PDIU-së, Aqif Rakipi, Interpol Roma thotë se është proceduar për vjedhje me emrin Skënder Ejylbegaj. Vjedhja në fjalë ka ndodhur në 03.11.1998, kohë kur deputeti ka deklaruar në formularin e dekriminalizimit se ka qenë emigrant në Itali.
Deputeti i LSI-së, Gledion Rehovica sipas Interpol Romës, është proceduar për vjedhje dyqani me emrin Kusta Mina në 27.02.1999, kohë kur vetë deputeti ka deklaruar se jetonte në Itali si student.
Të dy deputetët nuk deklaruan ndalimet në formular dhe as përdorimin e emrave të tjerë, çka sipas ligjit të dekriminalizimit përbën arsye për ndërprerje të menjëhershme mandati.
Para se të merrte vendimin, Komisioni Qendror i Zgjedhjeve rrëzoi kërkesën e avokatit të Aqif Rakipi, Theodhori Sollaku, i cili kërkoi të pezullohet kërkesa e prokurorisë.
Avokati Sollaku tha se kërkesa e Prokurorisë është në shkelje të ligjit, pasi sipas tij Aqif Rakipi nuk është dënuar nga asnjë vend i BE:
“Aqif Rakipi nuk është dënuar nga asnjë vend i BE dhe nuk është shpallur në kërkim ndërkombëtar. Aqif Rakipi nuk është dëbuar nga shtetet sipas ligjit dhe në situata të tilla nuk është hequr mandati”. TIRANA TODAY
