Një minator ka humbur jetën sot teksa po punonte në minierën e Bulqizës. Viktimë ka mbetur një 33-vjeçar, i identifikuar si Eris Keta.
Mësohet se një masiv gurësh është shembur duke rënë sipër minatorit, i cili po punonte në zonën D.
Ai është nxjerrë në sipërfaqe nga minatorët e tjerë që ndodheshin në të njëjtën galeri dhe është nisur me urgjencë drejt spitalit të Bulqizës, nga ku mësohet se mbërriti i pajetë.
Burimet mjekësore thanë se ai kishte marrë fraktura të rënda në trup, të cilave nuk ka arritur t’u mbijetojë. Ndërkohë pranë minierës mbërritën forcat e policisë që nisën veprimet hetimore për të zbardhur shkakun e incidentit në galeri.
