Kryebashkiaku i Lezhës, Fran Frrokaj është arrestuar mesditën e sotme në zyrën e tij. Sipas informacioneve paraprake, Frrokaj akuzohet për “shpërdorim detyre”, konkretisht për tjetërsim pronash.
Frrokaj është kryebashkiak nga Partia Demokratike i zgjedhur që nga viti 2015. Në fakt bëhet fjalë për një operacion të zhvilluar para pak minutash nga Policia e Lezhës, ndërsa KLSH zhvilloi prej një jave inspektim në Bashkinë e Lezhës.
Mësohet se në polici janë shoqëruar në total 24 persona, mes tyre edhe nënkryetari i Bashkisë së Lezhës, Enver Hafizi, juristja e Bashkisë e zyrtari i Hipotekës, të cilëve pritet t’u komunikohet masa “urdhër i arrestit”.
Frrokaj ka qenë i surprizuar në momentin që policia e ka shoqëruar në komisariat. Pritet që kjo ngjarjë të marrë përmasa më të mëdha, ndërsa kujtojmë se arrestime të bujshme janë paralajmëruar më parë nga ambasadori Donald Lu, i cili njoftoi se së shpejti ‘do kapen peshq të mëdhenj’.
Në fakt, Lu pati vënë janarin si afat, por pritet të shihet nëse arrestimi në fjalë do të marrë përmasa më të mëdha e nëse Frrokaj do të mund të quhet ‘peshk i madh’.
