Në konferencën e parë të Partisë së Lirisë, Meta vuri në dukje domosdoshmërinë e rikthimit të lirisë, për të cilën ka marrë edhe emrin partia. Meta pohoi se ndihej i lehtësuar për faktin që tashmë nuk e ka më kostumin e Presidentit, dhe se duhet të nisin nga puna deri në ditën e triumfit.
Meta nënvizoi ndër të tjera se armiku kryesor i lirisë nuk është vetëm autokracia, por korrupsioni. Për të, është ky korrupsion që e ka rënduar situatën e çdo qytetari shqiptar, dhe po përzënë të rinjtë.
“Është e domosdoshmërinë për të rikthyer lirinë. Aleati më i madh i kësaj kleptrokracie është indiferenca e madhe. Tani duhet të fillojmë menjëherë nga puna. Për fat të mirë, tani nuk e kemi më kostumin që na sillte atë pyetje a i lejohet të flasë kështu një Presidenti.
Tani jemi sot dhe deri në ditën e triumfit, të gjithë popullit të lirisë. Armiku kryesor i lirisë nuk është vetëm autokracia, por korrupsioni. Është ky korrupsion që e ka rënduar situatën e çdo qytetari shqiptar, në mënyrën më dramatike dhe po përzënë të rinjtë”, tha Meta.
Meta ngriti shqetësimin për situatën ekonomike në vend. “Situata e rëndë ekonomike është një realitet konkret dhe i pashmangshëm. Një shqetësim shumë i madh për të gjithë shqiptarët, që sot ndihen më të rrezikuar se kurrë në përballimin e jetës së tyre të përditshme për shkak të pasojave tepër serioze të krizës ekonomike që ka pllakosur vendi.
Barometri i Ballkanit në anketën e vitit 2022, ka konstatuar se 59% e qytetarëve në Shqipëri kanë problemin më madhor, situatën ekonomike.
Diferenca ëshë e ndjeshme në raport me vendet e tjera të rajonit. Konkretisht, sipas të dhënave të kësaj ankete, situata ekonomike është problem madhor për 40% të qytetarëve të Kosovës, 41% të boshnjakëve, 41% të malazezëve dhe 46% të serbëve.
Është fakt se periudha e vështirë e pandemisë, si dhe rritja stratosferike e çmimeve, me të cilën qytetarët shqiptarë po përballen çdo ditë, nuk janë shoqëruar me asnjë mbështetje nga ana e Qeverisë.
E gjithë barra shumë e rëndë e këtyre dy ngjarjeve me efekt ekonomik të jashtëzakonshëm për familjet e thjeshta shqiptare, ka rënë mbi qytetarët që varfërohen çdo ditë dhe më shumë”, tha Meta.
