Shqipëria e ka nisur me këmbën e mbarë aventurën në Ligën e Kombeve, pasi ka mposhtu në “Elbasan Arena” me rezultatin 1-0. Gjithçka u vendos nga supergoli i shënuar nga Taulant Xhaka në minutën e 55’, duke shënuar dhe golin e tij të parë me fanellën kuqezi. Pas kësaj fitoreje Shqipëria kryeson Grupin 1 të Ligës C në Ligën e Kombeve, me 3 pikë në një ndeshje të luajtur, duke lënë pas Skocinë që nuk ka zhvilluar asnjë ndeshje, dhe Izraelin me 0 pikë në një ndeshje.
Izraelitët e nisin më mirë takimin dhe shfaqen dy herë rrezikshëm para Strakoshës, por ky i fundit është i vendosur të mos e lejojë topin të shkojë në rrjetë. Ndërsa në minutën e 7’ kuqezinjtë kanë një rast të artë me Gurin, por që nuk kthehet në gol. E pabesueshme është ajo që humbet Izraeli në të 40’ kur shpërdoron një shans të artë me portë të boshatisur, por Strakosha nxiton të korigjojë atë gabim në komunikim mes tij dhe Gjimshitit, duke penguar sulmuesin e izarelit që të dërgojë topin në rrjetë.
Minuta e 55’ është vendimtare për Shqipërinë, me Xhakën që shënon një gol fantastik me goditje të shkëlqyer nga jashtë zone. Pavarësisht shqetësimeve në gjysmëfushën kuqezi, me disa raste të neutralizuara nga Strakosha, Shqipëria shfaqet ofensive me kundërsulme.
I tillë është rasti në minutën e 62’, kur Hysaj shpërdoron një shans fantastik kur pas asistit të Xhakës, i vetëm përballë portierit, ka dërguar topin jashtë kuadratit. Një tjetër shans i humbur është edhe ai i minutës së 75’ kur goditja e shkëlqyer e Hykës është ndalur në limite nga portieri izraelit.
Shqipëri-Izrael 1-0
Shënues: Xhaka 55’
Shqipëria: Strakosha, Binaku, Hysaj, Veseli, Xhimshiti, Basha, Memushaj, Xhaka, Guri, Hyka, Gavazaj.
Izraeli: Hainmov, Dasa, Habashi, Kapiloto, Natcho, Zahavi, Kayal, Dabbur, Yeini, Tëatha, Peretz.
