Sallata ruse gjendet në tavolinat shqiptare. Ajo përdoret në çdo sezon, e në raste festash shtohen edhe ndonjë produkt me një kosto më të lartë. Kjo pjatë mjaft e shijshme përmban patate, bizele, karota, ullinj dhe majonezë. Ndërsa nëpër restorante kjo sallatë njeh më tepër përbërës, ku nuk mungon salçiçja, mishi i pulës etj.
Receta shqiptare është përshtatur me kushtet ekonomike, pasi shumë nga përbërësit e sallatës që kanë qenë të shtrenjtë, janë hequr fare ose janë zëvendësuar me përbërës të lirë. Amvisat shqiptare përdorin mësë shumti fasule pllaqi, bizele, karota, patate apo tranguj turshi në përgatitjen e kësaj sallate.
E dini se nga e ka prejardhjen?
Sallata e famshme ruse është krijuar për herë të parë në vitin 1860, kur belgu Lucien Olivier, një shef kuzhine, e përgatiti variantin origjinal në një restorant luksoz në Moskë.
Që nga ajo periudhë, kjo sallatë është bërë tepër e famshme kudo nëpër botë, jo vetëm për shijen që ofron, por edhe për përgatitjen e thjeshtë që kërkon.
Fillimisht kjo sallatë u njoh me emrin Olivier, për shkak të mbiemrit të shpikësit. Por ajo që ende sot nuk dihet mirë, është pikërisht salca që ai e krijonte në fshehtësi.
Ishte një salcë krejt ndryshe nga majoneza që sot përdoret gjerësisht. Receta e saj ngelet ende e panjohur, edhe pse një ndihmës i Olivierit tentoi ta vidhte asokohe. Prandaj besohet se shija e sallatës së sotme ruse, nuk është kurrë ajo e sallatës së Olivierit.
