Fatura e një aksidenti në Shqipëri rëndon goxha buxhetin e një familje shqiptare. 5 milionë lekë shkojnë për ilaçe dhe shpenzimet nuk kanë të ndalur. “Top Channel” ka sjellë rastin e një vajze 14-vjeçare, e cila u aksidentua në 25 korrik. Rina Lala u dëmtua rëndë në një aksident në Valias, ndërsa ecte në trotuar së bashku me motrën. Përplasja ishte fatale, e ndërsa sot ajo ende ka dhimbje.
Për 12 ditë, e mitura luftoi për jetën në Spitalin e Traumës, me shumë fraktura në trup. Ajo tani qëndron e shtruar në qendrën spitalore “Nënë Tereza”. “Kam ende shumë dhimbje, madje edhe më dhëmb koka shumë, këmba shumë. Nuk mbaj mend asgjë, vetëm mbaj mend që më ka hedhur në ajër makina”, shprehet e aksidentuara.
Nena e Rinës, Valbona, është nënë e ve dhe me tre fëmijëve. 500 mijë lekë llogarit nëna e Rinës, se ka shpenzuar duke blerë ilaçe, pajisje, ndërsa 14-vjeçarja ende nuk është ngritur në këmbë. Ndaj drejtuesit të mjetit që aksidentoi vajzën, është marrë masa “arrest shtëpie”, ndërkohë që për dëmshpërblimin ende nuk ka folur njeri.
“Ka qenë në trotuar vajza. Ka kaluar një makinë me shpejtësi të madhe, e ka përplasur dy-tre metra zvarrë, pastaj dy metra lart. Ka rënë sipër makinës fati i saj. Ai (drejtuesi i mjetit) nuk është përgjigjur fare, ka ikur. Ka pësuar dëmtime në sistemin nervor, dëmtim veshkash, thyerje legeni.
E mbajta 12 ditë në Spitalin e Traumës, dhe nuk kisha ilaçe për t’i marrë dhe në kohën që vajza ishte në spital kam blerë vetë ilaçet e vajzës”.
Pse nuk kishte ilaçe spitali?
“Jo, nuk kishte ilaçe, i kam marrë në farmaci. Spitali vetëm i dha ndihmën e shpejtë që i bën grafi, skaner EKO, që ta shohin a është jashtë rrezik për jetën. Kam shpenzuar gati 5 milionë lekë për shëndetin e vajzës”, thotë Valbona Lala, nëna e të aksidentuarës.
Ndonëse vajza ndodhet e shtruar në një spital publik, ajo duhet ti blejë vetë mjekimet.
