Gjatë ditëve të fundit, përdoruesit e rrjeteve sociale kanë vendosur një foto profili në ngjyrë blu. Kjo jo pa një qëllim, pasi ka sjellë në fokus masakrën e Sudanit.
Fotoja në fjalë bashkëngjitet me hashtagun #BlueforSudan, #BlupërSudanin, referuar gjendjes kaotike në vend, ku mijëra njerëz janë përdhunuar, vrarë dhe janë hedhur në lumin Nil. Po pse ngjyra blu? Çfarë domethënie ka?
Ngjyra blu është ngjyra e preferuar e martirëve, të cilët kanë dhënë jetën për çështje të rëndësishme në mbrojtje të vendit, dhe tashmë është kthyer në simbol të ëndrrave të tyre për një Sudan më të mirë.
Në muajin prill të këtij viti, presidenti i Sudanit, Omar al-Bashir, u rrëzua pas muajsh me radhë protestash. Një situatë kaotike pllakosi pas sulmeve të dhunshme ndaj protestuesve civilë (që kërkojnë vendosjen e demokracisë) nga ana e ushtrisë, e cila ka marrë në dorë drejtimin e vendit.
Periudha e tranzicionit të kalimit nga një pushtet në tjetrin ka rezultuar tragjike për popullin. Për javë të tëra, vendit i është shkëputur interneti, nëpër rrugë ka vrasje, përdhunime dhe njerëzit po torturohen rrugëve. Ndonëse njerëzit po protestonin qetësisht dhe ishin të paarmatosur, ushtria ka vepruar dhe ushtruar forcë kundër tyre.
