Deklarata e trajnerit të Argjentinës, Jorge Sampaoli, se Dybala ishte shikuar si një fenomen dhe në kombëtare nuk kishte rezultuar i tillë, nuk është përtypur lehtë nga vëllai i tij menaxher, Gustavo Dybala. Ky i fundit me anë të një postimi në Twitter është shprehur se tek “albiceleste” ata që vendosin formacionin janë gazetarët.
“Sa e dëmshme, ky ekip kombëtar u ndërtua nga drejtuesit dhe gazetarët!”, shkroi Gustavo në profilin e tij në Twitter.
Dybala nuk u përfshi në skuadrën e Argjentinës për dy miqësoret e luksit kundër Italisë dhe Spanjës. Kjo pasi trajneri Jorge Sampaoli deklaroi se loja e 24-vjeçarit të talentuar nuk u përshtat me skemat e tij.
Edhe pse Gustavo e fshiu shpejt nga profili i tij këtë postim, kjo nuk i shpëtoi mediave italiane si Calciomercato.com dhe ItaSportPress. Argjentina luan sot (e premte) ndaj Italisë, ndërsa ndaj Spanjës do të luaj të martën.
