Nga një atentat i bërë dy dit më parë në Vlorë kanë mbetur të vdekur dy persona, ndërsa një i tretë ka mbetur i plagosu, që ishte edhe objektiv i sulmit. Armando Sulejmani, anëtar i bandës së Gaxhait, i njohur ndryshe si “Çipuri”, u bë dy ditë më parë pre e një atentati ku mbetën të vrarë kunati i tij dhe një nga shoqëruesit.
Por deri tani Policia e Vlorës bën me dije se nuk ka prova të mjaftueshme për të bërë të mundur identifikimin e autorëve. Një nga elementët që e vështirëson punën e grupit hetimor në zbardhjen e ngjarjes, është edhe mungesa e kamerave të sigurisë.
Kjo do të thotë që autorët e kanë studiuar më herët zonën ku do kryenin atentatin si edhe lëvizjet e 39 vjeçarit. Ndaj ata i kanë zënë pritë në një kthesë të pambuluar nga kamerat e sigurisë, pranë Ujit të Ftohtë.
Ky ishte atentati i dytë që kryhej ndaj Armando Sulejmanit, ndërkohë që më herët në vitin 2016 ai u plagos po në një tjetër atentat duke i shpëtuar vdekjes.
Tashmë Sulejmani gjendet për trajtim mjekësor në Spitalin e Vlorës, ndërsa në vendin e ngjarjes u gjetën 35 gëzhoja plumbash, çka tregon për agresivitetin e atentatorëve.
Arsyeja përse Çipuri i shpëtoi atentatit ishte fakti se ai ndodhej në pjesën e pasme të makinës, ndërsa plumbat i morën jetën shtetasve Arjan Hasani dhe Orest Rexho.
Edhe pse ishte në shenjestër të atentatit, Çipurit i është komunikuar nga Policia masa e arrestit, pasi iu gjet një pistoletë në makinë.
