Trajneri i kombëtares shqiptare, Edy Reja pak ditë më parë publikoi edhe listën përfundimtare të lojtarëve që do të grumbullohen për dy takimet e radhës për eliminatoret e Euro 2020. Kuqezinjtë do të përballen në transfertë me Islandën dhe më pas me Moldavinë në “Elbasan Arena”.
Një ditë më parë u konfirmua se mbrojtësi Egzon Binaku nuk do të ishte i pranishëm me grupin për shkak të një dëmtimi. Tashmë konfirmimi vjen edhe nga “FSHF”, se lojtari i Norrkopings nuk mund t’i bashkohet Kombëtares në grumbullim.
Për të vazhduar më tej, edhe Ledian Memushaj nuk ia ka dalë të rikuperohet në kohë me shqetësimet e ndjera në stërvitje. Futbollisti i Peskarës i duhet të lërë Kombëtaren, pasi nuk është i gatshëm për dy ndeshjet e radhës.
Disi surprizuese është fakti se Marash Kumbulla do të shkojë nga lista e Kombëtares A në atë të U-21, me lojtarin kuqezi që aktualisht është i angazhuar me klubin e Veronës në Itali. Ndërkohë nga “FSHF” konfirmohet se nuk do të ketë lojtarë të tjerë zëvendësues, por do të vazhdohet me grupin e mbetur nga lista fillestare.
