Lufta në Kosovë ka lënë pas shumë momente të dhimbshme tek qytetarët, pasi konfliktet morën shumë jetë njerëzish, ndërsa konfliktet mbetën të hapura edhe pas luftës. Valdete Idrizi e Adriana Hoxhiq , të palëkundura ndaj sfidave të pasluftës në qytetin e ndarë të Mitrovicës, ndërsa me përpjekjet e tyre ndikuan në përmirësimin e realitetit në këtë pjesë të rajonit të Kosovës.
Pas periudhës së luftës kur pajtimi dukej të ishte i pamundur në qytetin etnikisht të ndarë, në skenë dolën dy gra që morën guximin ta bëjnë hapin e parë, njëra nga shoqëria civile, ndërsa tjetra nga fusha politike.
“Ato me dijen, guximin dhe dashurinë e madhe për qytetin e tyre, arritën që në momentet më delikate të qetësojnë gjakrat në mes të dy etniteteve të cilat mbanin mëri prej dekadash, dhe në fund të relaksojnë raportet mes shqiptarëve e serbëve nga të dyja pjesët e qytetit të Mitrovicës”-shkruan Kosova Press.
Dy gratë e “fuqishme” si Valdete Idrizi dhe Adriana Hoxhiq, qëndruan të palëkundura përgjatë këtyre viteve të pasluftës, përballë sfidave jashtëzakonisht të vështira që vinin nga grupet ekstremiste serbe, e që pretendonin me çdo kusht dëbimin e plotë të shqiptarëve nga veriu dhe ndarjen e qytetit. Po me nismat e tyre ata krijuan një qasje krejtësisht të re për këtë rajon, i cili ishte dëshmitar i shumë ngjarjeve të dhimbshme në këtë rajon.
