Dy deputetë të zgjedhur kosovarë kanë kërkuar që vendi të shkojë sërish në zgjedhje të jashtëzakonshme.
Kërkesa është bërë nga deputeti i Nismës, Zafir Berisha dhe ai i Lëvizjes Vetëvendosje, Arbër Rexhaj. Berisha thotë se nga zgjedhjet kanë dalë deputetë që janë bërë mendjemëdhenj ende pa filluar punën.
“Deputetëve të zgjedhur aksidentalisht ju ka rritur mendja deri atje ku i japin të drejtë vetes me shitë mend deri në atë shkallë, sa që bllokimin e bërjes së qeverisë e shohin si vlerë dhe objektivë politike, ndërsa harrojnë se gjatë fushatës e kanë kërkuar votën prej sovranit për interes të Kosovës”, shprehet Berisha, raporton PrizrenPress.
Ndërkaq, deputeti i Lëvizjes Vetëvendosje, Arbër Rexhaj thotë se nëse Vetëvendosje nuk e formon qeverinë, vendi duhet të shkojë në zgjedhje:
“Dy rrugë kanë mbetur: ose Vetëvendosje në qeveri, ose sërish në zgjedhje. Jo pse këtë e duam ne por PAN-i, i cili po këmbëngul pa pasur deputetët e nevojshëm të krijojë një qeveri “të lodhtë” nuk do të krijojë stabilitet afatgjatë në vend”.
