Një ngjarje e rëndë ka ndodhur sot në Durrës, ku një 52-vjeçar ka humbur jetën pas sherrit me një bashkëfshatar të tij.
Ngjarja ka ndodhur rreth orës 09:40 në fshatin Jubë të Sukthit, ku shtetasi Asti Mici, 57 vjeç, për motive të dobëta ka goditur me mjete të forta, në pjesën e sipërme të kokës shtetasin Ludovin Lala, 52 vjeç.
Ky i fundit, fatkeqësisht nuk ka mundur t’u rezistojë plagëve dhe ka ndërruar jetë në Spitalin Rajonal të Durrësit.
Policia njofton se autori është shoqëruar në polici, ndërsa mësohet se shkak i konfliktit është bërë vaditja. Viktima kishte vendosur një zetor në anën e lumit për të marrë ujë, por duket se kjo u bë shkak për sherr me autorin. Pas debateve, autori e ka qëlluar atë me kosën e barit duke i shkaktuar vdekjen.
Grupi hetimor po punon për zbardhjen e plotë të ngjarjes dhe kryerjen e veprimeve të mëtejshme procedurale.
