Një 52-vjeçar, i cili drejtonte urbanin në Durrës, ka rënë në prangat e policisë, pasi akuzohet për shkelje të rregullave të qarkullimit rrugor.
Sipas njoftimit të policisë, shoferi i urbanit ka drejtuar autobusin paraditen e sotme me derë hapur, për pasojë, fatorinoja S.T., 50 vjeçe është rrëzuar nga mjeti duke përfunduar i plagosur në rrugë.
Fatorinoja u transportua në spital dhe ndodhet nën kujdesin e mjekëve, jashtë rrezikut për jetën, ndërsa shoferi u arrestua. Nga testi i alkoolit, rezultoi se shoferi ishte në gjendje të dehur.
Njoftimi i policisë:
Specialistët e Qarkullimit Rrugor në D.V.P. Durrës, arrestuan në flagrancë shtetasin S.K., 52 vjeç, banues në Shkallnur, Durrës për veprën penale “Shkelja e rregullave të qarkullimit rrugor” dhe ” Drejtimi i automjetit në gjendje të dehur”.
Arrestimi i tij u bë pasi paraditen e sotme ky shtetas duke lëvizur me autobusin e Unazës, Durrës, ka lënë hapur derën e autobusit ku për pasojë është rrëzuar fatorinoja shtetasja S.T.,50 vjeçe, e cila u transportua në spital dhe ndodhet nën kujdesin e mjekëve, jashtë rrezikut për jetën.
Drejtuesi i mjetit u shoqërua në Komisariat dhe nga testi i alkoolit rezultoi të ishte në gjendje të dehur.
Materialet hetimore i kaluan Prokurorisë për veprime të mëtejshme.
