Kryetari i Partisë Bashkimi për të Drejtat e Njeriut, Vangjel Dule ka shkuar sonte në ambientet e Drejtorisë së Policisë së Gjirokastrës pas ndalimit të 12 ekstremistëve grekë.
Pasi ka dalë nga Policia, Dule është ndalur para gazetarëve shqiptarë dhe grekë të cilët ishin aty për fjalën e tij. Përballë kërkesës së gazetarëve shqiptar për të folur në gjuhën shqipe, Dule ka zgjedhur t’i “shpërfillë” ata dhe të flasë në gjuhën greke.
Ai u shpreh në gjuhën greke se janë 12 persona të proceduar, të cilët do të qëndrojnë për 10 orë në komisariat. Dule ka kërkuar më tej lirimin sa më shpejt të personave të arrestuar.
“Nga autoritetet policore u informuam se behët fjalë për 12 të shoqëruar të cilët janë në proces verifikimi. Afati maksimal i kësaj procedure është deri në 10 orë. Shpresojmë që i gjithë procesi të përshpejtohet dhe të gjithë të jenë të lirë për të vazhduar në normalitetin e jetës së tyre,” deklaroi Dule.
