Presidenti i FSHF-së, Armand Duka i ftuar në emisionin “Rubrika Sportive” në RTSH, flet për kandidaturën e tij për një mandat të pestë në krye të FSHF-së. Ai ka mohuar se është duke bërë një fushatë në këtë periudhë, pasi thjeshtë është duke takuar miqtë e tij. Po ashtu duka është duke folur edhe për arritjet që ka bërë Federata në drejtimin e tij, pasi e mori të shkatërruar dhe sot ka një infrastrukturë mjaft të mirë.
Fino akuzon se gara është e padrejtë. Pse nuk zbardhet lista me delegatët?
Kam parë që Fino ka bërë një kërkesë për delegatët në Asamble. Pak a shumë dihet se kush do jetë. I kam kërkuar sekretarit Shulku që të gjithë ta kenë listën e delegatëve. Nuk e konsideroj deformim gare. Afati ka qenë deri dje për listën e delegatëve.
1 dekadë e gjysmë në krye të FSHF, pse mendoni se vetëm Zoti ju ndalon të kandidoni?
Nuk mendoj se mund ta bëj vetëm unë. Mund të ketë shumë më të aftë, por duhet të kenë programin e tyre. Unë mendoj se e njoh shumë mirë, në këto 16 vite jam rritur unë, federata dhe i gjithë komuniteti. Kam marrë shumë eksperiencë, nuk mendoj se jam i vetmi, por më i mirë.
Arritja më e madhe…
FSHF ka bërë shumë hapa përpara. Gjëja më e rëndësishme është konsolidimi i institucionit, që nga infrastruktura deri tek e gjitha si organizatë. Është ndryshuar infrastruktura në të gjithë Shqipërinë. Më parë FIFA dhe UEFA nuk financonin shumë para në Shqipëri, ndërsa tani po hedhin shumë para këtu.
Ne kemi filluar të licensojmë trajnerë, teksa më parë nuk dihej se ku mund të bëhej shkolla e trajnerit. Licensa që sot jep FSHF njihet në të gjithë botën. Më parë ka pasur vetëm një kampionat, sot i kemi të gjitha nivelet, të gjitha zonat dhe rajonet. Kampionate për të gjitha moshat. Kemi filluar futbollin e femrave, diçka e vështirë në Shqipëri. Kemi ekipe kombëtare me moshat e femrave.
Kemi rritur numrin e njerëzve dhe të fëmijëve që luajnë futboll në Shqipëri. Gjithashtu, kemi rritur edhe përfaqësimin e Shqipërisë në arenën ndërkombëtare, edhe me kalimin e tureve të ekipeve të Superiores në kupat e Europës.
Çfarë merite keni tek kualifikimi i Kombëtares…
Unë nuk e mendoj si diçka individuale. Është diçka kolektive, aq më pak ta mendoj këtë në futboll. Kam bërë mirë pjesën që më takon si president, por ka qenë një punë e lojtarëve, stafit teknik, e gjithë administrata e FSHF.
