30 parti të vogla janë bashkuar për realizimin e Reformës Zgjedhore.
Kështu, krerët e këtyre partive joparlamentare kanë krijuar frontin e bashkuar të partive politike opozitare, ku morën pjesë kryetari i PAA-së, Agron Duka, kryetari i PDS-së, Paskal Milo, kreu i Partisë së re Zgjidhja, Koço Kokëdhima, Sazan Guri etj.
Pas mbledhjes, ata kanë dalë në një deklaratë të përbashkët, me anë të së cilës kërkuan që procesi i Reformës Zgjedhore të udhëhiqet nga OSBE-ja dhe të përfundojë brenda marsit 2018.
Krerët e partive të vogla u bënë thirrje PD-së dhe LSI-së që të mos flasin në emër të opozitës, por vetëm në emër të partive të tyre.
Gjithashtu, në deklaratë thuhet se partitë e mëdha duhet të heqin dorë nga administrimi i zgjedhjeve, Kodi i ri Zgjedhor duhet të garantojë identifikimin biometrik të zgjedhësit, votimin dhe numërimin elektronik, ndërsa shtohet se Reforma Zgjedhore duhet të realizohet me transparencë dhe jo me pazar mes Rilindjes dhe PD së.
“Reforma zgjedhore duhet të udhëhiqet nga prezenca e OSBE-së. Kjo reformë duhet të përfundojë deri më 31 mars 2018, me qëllim që zgjedhjet vendore të vitit 2019 të reformohen. Pretendimi i qeverisë që e kushtëzon reformën me listat dhe të drejtën e votës së diasporës nuk ka bazë.
Vota e diasporës nuk është e domosdoshme për zgjedhjet vendore. Partitë e vjetra politike duhet të heqin dorë nga administrimi i zgjedhjeve. Ato kanë kryer krime të rënda elektorale dhe kanë shkatërruar zgjedhjet e lira në Shqipëri. PD dhe Edi Rama duhet të kërkojnë ndjesë publike për krimet elektorale që kanë kryer ndër vite.
Kodi i ri Zgjedhor duhet të garantojë identifikimin biometrik të zgjedhësit, votimin dhe numërimin elektronik. Ky Kod duhet të ndalojë që listat zgjedhore të hartohen nga kryetarët e partive”, thuhet në deklaratën e partive të vogla.
