Kryetari i Partisë Agrare Ambientaliste, Agron Duka deklaroi sonte se do të largohet nga koalicioni me Partinë Demokratike dhe nga kryetari i saj Lulzim Basha nëse ai nuk mund të heq Fatmir Xhafajn nga posti i ministrit të Brendshëm. I ftuar në “360 Gradë” në Ora News, Duka thekson që jo vetëm ai, por dhe të tjerët do t’i largohen Bashës nëse ai nuk arrin sukses në shkarkimin e Fatmir Xhafajt.
Gjithashtu, Duka thotë se pavarësisht miqësisë me ministrin e Brendshëm, Fatmir Xhafaj, ai nuk mund të jetë ministër për sa kohë vëllain e ka të implikuar në trafik droge.
“Nuk mund të jetë ministër i Brendshëm dikush që ka vëllain të implikuar në trafik droge. Jam totalisht kundër kësaj. Nuk merrem as me Babalen as me dikë tjetër. Nuk e kam me Xhafajn si individ, e kam mik dhe do ta kem. Politikisht, jam kundra. Edhe nëse Basha dhe anëtarët e tjerë të opozitës nuk triumfojnë në këtë lloj lufte që po bëjnë për mendimin tim nuk kanë bërë asgjë. Nuk di si mund të shkojnë në zgjedhjet e ardhshme vendore pa hequr këtë ministër të Brendshëm. Nëse nuk arrin sukses, jo vetëm unë por edhe të tjerë do t’i shkëputen zotit Basha”, deklaroi Duka.
