Presidenti i Federatës Shqiptare të Futbollit, Armand Duka, ka shpjeguar në “Wake Up” në “Top Channel”, pse ka paditur deputetin socialist Erion Braçe për shpifje. Konflikti në distancë mes kreut të FSHF-së Armand Duka dhe deputetit socialist Erjon Braçe, ka përfunduar në Gjykatën e Tiranës. Kreu i futbollit nuk i është përgjigjur akuzave të Braçes mbi evazionin fiskal, por menjëherë është vënë në veprim, në instanca të larta. Duka e ka paditur Braçen për shpifje dhe dëmtim të imazhit. Në fokus të kësaj padie janë deklaratat që deputeti Braçe ka deklaruar apo publikuar në profilin e tij në rrjetet sociale, kundër presidentit të Federatës, të cilin midis të tjerave e akuzon edhe për mospagim të detyrimeve.
Ai thotë se nuk ka kohë të merret me deputetin, ndaj vendosi që ta ndjekë në mënyrë ligjore çështjen në fjalë. Po kështu, Duka nuk e lë me kaq, duke i kujtuar kodin e etikës Erion Braçes.
“Më thonin pse nuk i përgjigjesh. Por nuk kam kohë për Erion Braçen. Nuk merrem me njerëz që nuk kanë çfarë të bëjnë tjetër, veçse të flasin. Vendosa të angazhoj njerëzit e duhur, për ta ndjekur në mënyrë ligjore këtë çështje. Njerëzit duhet të jenë etikë ndaj atyre që kritikojnë. Nuk e kisha menduar këtë padinë, por dëgjova kryeministrin për këtë punën e shpifjeve, dhe thashë ta provoj”, deklaroi kreu i FSHF-së.
