Presidenti i FSHF-së, Armando Duka, teksa është i ftuar në emisionin “Top Story” në Top Channel, ka folur për zgjedhjet e ardhshme për kreun e FSHF dhe kandidatët e mundshëm. Po ashtu ka sqaruar edhe akuzat e shumta të drejtuara nga klubet për kreun e Federatës, duke i quajtur që nuk kanë asnjë lidhje me futbollin, por i bëjnë për hesape personale.
Akuzat e klubeve ndaj Federatës apo edhe ndaj Jush personalisht?
“E gjithë kjo situata me klubet është ngritur për faktin e një gabimi që mund të ketë ndodhur një ndeshje apo më shumë. Por kjo nuk është aspak me tendencë, pasi sporti i rezervon këto gabime. Ata që ngrenë zërin dhe hedhin baltë ndaj FSHF-s, nuk e bëjnë për aspekte sportive, por kanë interesa të tjera personale për ta bërë.”
Për moszgjedhjen në UEFA dhe dënimi i Skënderbeut
“Nuk është ngjarje e veçantë, përderisa akuzohet një skuadër e futbollit që drejton, është minus. Ka pasur shtysa të jashtme që nuk e di nga kanë ardhur. Ne letrat gjithmonë na vijnë nga fshati (qesh). A ka pasur ndërhyrje? Po patjetër, janë bërë publike. Unë në fakt nuk e kam përjetuar dhe nuk e cilësoj dështim moszgjedhjen. Ka qenë një letër që u shkoi të gjitha Federatave. Duket sikur vinte nga një personazh politik po nuk e di, ka qenë anonime. Çështja a Skënderbeut apo hetimit ishte negative, por gjithsesi, nuk e konsideroj dhe nuk e kam përjetuar keq rezultatin”.
Për menaxhimin e klubeve…
“Ke klube të vogla që menaxhohen shumë mirë si për shembull mund të them Laçi. Klub me financa modeste që ka infrastrukturë shumë të mirë të ndërtuar me kontribute të FSHF-së, bashkisë dhe drejtuesve. Ka shumë vite që konkurron në Superiore. Vërtetë organizohet mirë dhe bën futboll. Ke të tjera që shpenzojnë më shumë dhe janë menaxhuar shumë keq e nuk kanë rezultate.Unë jam tifoz me Vllazninë në fakt, por besoj se duket qartë që shkodranët nuk kanë përfituar aspak nga kjo”
Për kandidimin e mundshëm të Bashkim Finos
“Aq sa thatë ju, kam dëgjuar edhe unë për Bashkimin, që mund të jetë, mediatikisht, E njoh, kam marrëdhënie personale me të, e kam pasur shok shkolle. E respektoj si njeri. Sa i përket kandidimit si pjesë e një partie, i përket atij ta mendojë. Nëse partia do ta kandidoj, ta kandidojë nga selia e partisë, të jetë kandidati i zyrtarizuar i partisë. Ne kemi pasur deputetë që kanë deklaruar nga foltorja e parlamentit që arbitrin e godita unë, edhe kjo mund të ndodhë. Nuk besoj se partia Socialiste do të angazhohet në një fushatë sportive, edhe nëse një nga radhët e saj mund të jetë kandidat”.
