FSHF në bashkëpunim me qeverinë aktuale kanë miratuar një fond që kompleksin Dinamo ta kthejnë në zyrat e reja të Federatës. Punimet kanë filluar, por çfarë ndodhi me historinë që kishte brenda ai kompleks, ku përfunduan ata sportistë të mëdhenj. Dinamo si ekip futbolli prej disa vitesh është në nivele shumë të ulëta dhe nuk ka marrë asnjë suport nga Federata, përveç se iu dha goditja finale tashmë duke e larguar edhe nga shtëpia. Presidenti Armand Duka është shprehur se : “Nuk mund të ndihmoj Dinamon të ringrihet, nuk është faji im që nuk ekziston Ministria e Brendshme.”
Por shkatërrimi i Dinamos është bërë më serioz se sa dukej në fillim. Federata nuk ka treguar kujdes për dorëzimin e bazës materiale që kishte brenda kompleksi Dinamo, tek ekipi përkatës, por i ka nxjerrë në rrugë edhe shiten në tregjet buzë rrugës. Këtë fakt e ka kontestuar ish-volejbollisti i famshëm i Dinamos dhe i ekipit kombëtar të viteve 80’, Shaban Uka.
Ky i fundit ka reaguar me anë të një statusi në “Facebook” ku shkruan: Sot rastësisht pashë këto fotografi. Kur pyeta personin që i kishte për foton time, më tha: “Është Shaban Uka, ka qenë sportist i madh.” Një herë e një kohë qëndronin të varura në klubin Dinamo, ndërsa sot pas shkatërrimit të ekipeve e së fundmi dhe vetë klubit, fotot e sportistëve që për gjysmë shekulli bënë historinë në Shqipëri dhe në Europë, shiten në rrugë… TIRANA TODAY
