Pandemia e koronavirusit ka bërë që dasmat në të gjithë botën të anulohen ose shtyhen, disa nga izolimi dhe të tjera për shkak të distancimit social dhe rregullit për një numër të kufizuar të ftuarish.
Kjo ka prishur planet e shumë çifteve.
Së fundmi, një grup nusesh, të zemëruara nga këto zhvillime dolën duke protestuar në Romë të Italisë, pranë “Fontana di Trevi”.
“Jam këtu për të protestuar pasi duhej të martohesha këtë vit, por nga pandemia nuk mund të gjeja një restorant, kështu që isha e detyruar ta shtyja për vitin tjetër. Shpresoj që çdo gjë të shkojë mirë dhe të martohem vitin tjetër”, u shpreh një nga protestueset.
Kujtojmë se dasmat u lejuan sërish të mbaheshin në Itali që prej 18 majit, por me shumë pak të ftuar.
Ndërkohë, mbajtja e maskave është e detyrueshme për të gjithë, madje edhe për çiftin, ndërsa nuk lejohet hedhja e buqetës apo orizit tradicional si dhe shoqërimi i nuses krah për krah nga babai në altar për shkak të distancimit social, shkruan “A2”.
