Në Korçë u vërtetua se në një ndeshje pa tifozë nuk ka spektakël. Skënderbeu barazoi me Laçin në shtëpi në një stadium të boshatisur, pasi korçarët janë dënuar pas ngjarjeve në ndeshjen e parë përballë Partizanit.
Një ndeshje që filloi në ritme të larta dhe ishte Laçi më kërkues. Pikërisht bardhezinjtë kalojnë të avantazh me anë të fantazistit Myrto Uzuni, në minutën e 30’. Korçarët reaguan menjëherë dhe vetëm katër minuta më vonë, rikthyen baraspeshën me anë të Gjergji Muzakës.
Për t’u përmendur është fakti që Skënderbeu luajti 20 minutat e fundit me një lojtar më pak, pasi mbrojtësi i majtë, Abazaj u ndëshkua me karton të kuq në minutën e 72-të.
Gjithsesi, ndonëse me 10 futbollistë, korçarët tentuan deri në fund të gjejnë golin e fitores dhe i shkuan disa herë pranë, por fillimisht Otto John dhe më pas Vangjeli, gabuan në tentativat për të shtyrë topin në rrjetën e Selmanit.
Edhe pas kësaj jave, korçarët mbeten në krye me 7 pikë, të ndjekur pikërisht nga kurbinasit me 5, në pritje të takimeve të tjera, që do të luhen nesër dhe të dielën.
