Pas komunikimit me anë të rrjeteve sociale që patëm për duelin mes Anthony Joshua dhe Joseph Parker, tani ka ardhur edhe takimi i tyre i parë përballë njëri-tjetrit. Takimi i dy boksierëve të peshave të rënda u organizua në hotelin Dorchester, ku atmosfera ishte e nxehur pas deklaratës së ekipit të Parker se Joshua merrte steroide.
Madje kundërshtari i tij e kishte quajtur boksierin britanik “mbret të steroideve”, për këtë arsye 28-vjeçari kishte thënë se nuk do t’ia jepte dorën rivalit të tij. Sidoqoftë, në fund Joshua dhe Parker dolën ballë përballë para kamerave dhe gazetarëve, dhe padyshim se sytë e tyre shprehnin shumë agresion.
Parker do të jetë kundërshtari i 21-të i Joshuas. Dueli ndërmjet të boksierit anglez dhe atij nga Zelanda e Re, do të zhvillohet në Principality Stadium të Cardiffit më 31 mars. Krahas titujve IBF, WBA dhe IBO të Anthony Joshua, në garë është vënë edhe titulli WBO i Parkerit.
