Një numër i vogël i tifozëve serbë, rumunë dhe grekë gjatë ndeshjes miqësore që Kosova zhvilloi me Madagaskarin në Francë kanë tentuar ta ndërpresin atë.
Sipas gazetës “Blic” në Serbi dhe disa pamjeve të publikuara nga po ky medium, duken disa persona që afrohen pranë rrethojave të stadiumit ku po zhvillohej ndeshja dhe shpalosin disa banderola që nuk shihet qartë se çfarë shkruhet. Pasi largohen shumë shpejt me vrap pasi afrohet policia. Më pas, përmes fotografive që publikon “Blic” në Serbi, bëhet e qartë se çfarë ka pasur të shkruar në banderolat në fjalë, që thuhet se janë bërë nga një bashkëpunim i disa tifozëve serbë, rumunë e grekë.
Në njërën shkruhej “UEFA e përkrah terrorizmin”, kurse në tjetrën “Kosova-Nuk ka dorëzim”. Me banderola në duar ata kërkonin të ndërprisnin ndeshjen si shenjë hakmarrje ndaj dronit që tërboi serbët në ndeshjen mes Serbisë dhe Shqipërisë. Për këtë ngjarje ka reaguar zyrtari i sigurisë në FFK, Bylent Smekiqi.
Në një intervistë për “Insporti” ai ka deklaruar: “Ne kemi qenë të informuar për rastin në fjalë dhe kemi marrë të gjitha masat bashkë me Policinë Franceze dhe Sigurimin privat. Ai rast ka ndodhur jashtë stadiumit, përkatësisht jashtë rrethojës, kështu që është në kompetencën e Policisë së Francës që ka reaguar shumë mirë dhe askush prej nesh nuk ka qenë i rrezikuar për asnjë moment”, është shprehur Smakiqi.
