Presidenti i Republikës, Ilir Meta përshëndet aksionin e fundit të Policisë së Shtetit për kapjen e 613 kg kokainë në Portin e Durrësit.
Ndërsa para Metës, ishte vetë ministri i Brendshëm Fatmir Xhafaj, reagoi për sasinë rekord prej 613 kg kokainë të kapur në Portin e Durrësit.
Në një postim në rrjetet sociale, Xhafaj thotë se ky ishte një superoperacion i Policisë së Shtetit në bashkëpunim me agjencitë e tjera ligjzbatuese shqiptare dhe të huaja.
“Një superaksion i Policisë së Shtetit në bashkëpunim me agjencitë e tjera ligjzbatuese vendase dhe të huaja.Goditje e fortë trafikut ndërkombëtar të drogës!Hetimi vazhdon!Forca e Ligjit, forca e shtetit po vepron. Pas pak detajet nga policia e shtetit në një konferencë për shtyp”, shkruan Xhafaj në Tëitter.
Por, edhe pse Xhafaj reagoi nën “petkun” e ministrit duke falënderuar “skuadrën” që ai drejton, Meta nga ana tjetër duket se i ka thurur elozhe ekipit të ministrit, duke u nënkuptuar që pak merita nga kjo punë ka dhe vetë Xhafaj.
Presidenti Meta duke theksuar rrezikun kryesor që i vjen sigurisë kombëtare të vendit nga fuqizimi i krimit të organizuar dhe trafikut të drogës, kërkon thellim të mëtejshëm dhe intensifikim të bashkëpunimit të agjencive ligjzbatuese me partnerët ndërkombëtarë.
Presidenti Meta përshëndet rolin e Anti-Mafias italiane dhe paralajmërimet e saj konsistente për rrezikun që i vjen, jo vetëm Shqipërisë dhe Italisë, por edhe rajonit, nga fuqizimi i krimit të organizuar.
Presidenti Meta thekson në mënyrë të përsëritur domosdoshmërinë për rritjen e kapaciteteve për forcimin e sigurisë së kufijve të vendit, veçanërisht të pikave të kalimit kufitar dhe inkurajon pastrimin e Policisë së Shtetit dhe gjithë agjencive ligjzbatuese nga elementët e inkriminuar, në funksion të përmbushjes me sukses të detyrimeve ligjore dhe kushtetuese.
Më herët dhe kryetari i opozitës Lulzim Basha ka reaguar lidhur me sekuestrimin e kokainës ku kërkoi krijimin e menjëhershëm të një qeverie anti-mafia. TIRANA TODAY
